Agnese Leone est un’illustradora de libros pro pitzinnos. Est nàschida in Casteddu e, como, est professora in su Litzeu Artìsticu de Carrara. At illustra nos canto libros de sas Editziones Papiros e est sighende a nd’illustrare àteros. In custa pàgina, faeddamus de issa e de s’arte sua.
Ite istùdios as fatu ?
A pustis de su litzeu sientìficu, apo otentu sa làurea triennale in Gràfica de arte in s’Acadèmia de Bellas Artes Mario Sironi de Tàtari, in ue como so istudiende pro sa làurea magistrale.
Deretu a pustis de sa làurea triennale, apo frecuentadu unos cantos cursos de illustratzione e apo cunsighidu su Màster Ars in Fabula in illustratzione pro s’editoria de Macerata.
Cando as cumintzadu a pònnere in fatu a sa passione de s’illustratzione pro s’infàntzia ?
Su mundu de s’illustratzione m’at semper apassionadu : cando fia pitzinna, mama mea comporaiat semper libros a beru bellos de lèghere, ma s’incontru cun illustradores comente Pia Valentinis, Ignazio Fulghesu e Maria Chiara Aresti m’at fatu nàschere sa gana de intrare a fàghere parte de cussu mundu.
Àteros cursos de ispetzializatzione in illustratzione pro sa infàntzia as frecuentadu ?
Nd’apo frecuentadu, mescamente sos cursos cun Carll Cneut, Pia Valentinis, Jimmy Liao, Paolo Canton.
E a fieras de su libru pro s’infàntzia andada bi ses ? Ùtile t’est partu a b’andare ?
Oramai est dae carchi annu chi ando a sa Fiera de sos libros pro pitzinnos de Bologna, fiera bella a beru e fundamentale, chi cunsentit de bìdere e connòschere deghinas de illustradores de totu su mundu. Sa fiera de Bologna est ùtile siat pro leare cuntatos editoriales, siat pro t’abèrrere sos ogros in su panorama mundiale de s’illustratzione.
In collaboratzione cun unos àteros artistas as traballadu ?
In ocasione de unas cantas editziones de su fèstival de literadura pro piseddos Tuttestorie de Casteddu, amus fatu mustras colletivas cun àteros illustradores.
As in pessu publicadu duos libros cun Papiros [“Su mundu incantadore de sas formigas” e “Picnic”] chi tenent comente argumentu sas fòrmigas ! Comente mai custu interessu pro custu babbautzu ?
Su mundu naturale est una bena de ispiratzione istremenada, m’incantant totu sos animales, sos fundos e sos babbautzos.
Sas fòrmigas mi tirant in manera particulare ca, essende gasi minores, sunt capatzas de una fortza ùnica, e de s’organizare in comunidades cumplessas a beru.
Ite inditu das a chie si bolet acurtziare a s’illustratzione pro s’infàntzia ?
De tènnere passèntzia manna e de mantènnere s’idea de su chi bolimus.
Cales sunt sas tècnicas chi preferis e pro ite ?
Adoro a isperimentare : apo cumintzadu cun unu sinnu pretzisu a rapidògrafu, a pustis apo isperimentadu sas tramastràmite sa tècnica de s’intzisione impreende materiales diferentes comente modellos.
Ambos libros publicados cun Papiros sunt fatos cun custa tècnica, apo impreadu modellos de gomma e de linoleum e, a pustis, cun misturitzos de tintas, mi so posta a los imprentare in sos fògios de pabiru, montende totu, a pustis, cun Photoshop.
A ùrtimu, so pintende in digitale, chirchende de torrare a creare sas tramas naturales.
Àteros libros ses ammaniende ?
Como so traballende a sas illustratziones pro unu libru de sas costellatziones. Luego apo a pòdere nàrrere carchi cosa de prus !
[Pregontas de Diegu Corràine]